Франциянын президенти Эммануэль Макрон АКШнын глобалдык Париж келишиминен чыгуу тууралуу чечимин "ашкере агрессивдүү" деп баалады. Ошол эле учурда бул кадам мунасанын иштешине түрткү бергенин белгиледи.
- Президент Трамптын Париж келишиминен жөн гана чыгып кетүү чечими жаңы тарыхтын башталышы болду. Анын чечиминен кийин биз ратификацияны тездетип, клубга көбүрөөк өлкөлөр кошулду жана Париж келишимин ратификациялашты, деди Макрон.
Бирок Макрон Трамп кайра кайтса кубанычта болорун кошумчалады.
Ушу тапта Франция Париж макулдашуусунун эки жылдыгына карата “Бир планета” саммитин өткөрүүдө. Анын максаты - экономикасы өнүккөн өлкөлөрдү, бай компанияларды глобалдык климаттын өзгөрүшүнө каршы күрөшкө жана жарды өлкөлөргө көмөктөшүүгө каражат бөлүүгө үндөө. Дүйнө коомчулугу 2020-жылга чейин буга 100 млрд. доллар кошууга тийиш.
2015-жылы 200дөй мамлекет Париж макулдашуусуна кирген. Ал эми быйыл жайында Дональд Трамп шайлоо алдындагы убадаларынын бирин аткарып, АКШ Париж келишиминен чыгаарын жарыялаган.
