11-ноябрда Жогорку Кеңештеги "Республика - Ата-Журт" фракциясынын мүчөсү Улан Чолпонбаев мезгилсиз дүйнө салды.
Маркумдун жакындарынын "Азаттык" үналгысына билдиргенине караганда, 40 жаштагы депутат акыркы мезгилде бөйрөгү ооруп ооруканада дарыланып жаткан. 11-ноябрдын таңында комага түшүп, ушул эле күнү кечке жуук каза болгон.
Улан Чолпонбаев Жогорку Кеңештин бешинчи жана алтынчы чакырылышынын депутаты. 1977-жылы Фрунзе шаарында төрөлгөн. Бала чагы Ысык-Көлдүн Ак-Суу районундагы Боз-Учук айылында өткөн. 1997-жылы Кыргызстандын Эл аралык университетинин Эл аралык укук факультетин аяктаган.
2009-жылы Москвадагы Айыл чарба академиясынын финансы жана менеджмент факультетин аяктаган. 2010-жылы "Ата-Журт" партиясынан Жогорку Кеңешке депутат болуп шайланып келген. 2015-жылы "Республика-Ата-Журт" фракциясынын курамында мандат алган.
Үй-бүлөлүү, эки баланын атасы.
