Ооган президенти АКШнын Ооганстан жана Түштүк Азия боюнча жаңы стратегиясын кубаттап, Пакистанды коңшусуна карата саясатын өзгөртүүгө чакырды. Ашраф Гани 23-августтагы элге кайрылуусунда Ооганстандагы туруксуздук эч кимге пайда алып келбестигин, Американын жаңы планында эки тараптын тең кызыкчылыгы эске алынганын айтты:
“Мен президент Трамп жана анын администрациясына рахмат айтам. Узакка созулган талкуудан кийин алар биздин кызыкчылыгыбыз жана коопсуздугубуз сактала турган стратегияны иштеп чыгышты. Ооганстан дүйнө коопсуздугунун биринчи бастиону экенин унутпайлы”,-деди ооган президенти.
Ал Пакистан мурдагы ыкмаларынан баш тартышы керектигин, ооган өкмөтү расмий Исламабад менен жакшы мамиледе болууну кааларын кошумчалады.
21-августта АКШ президенти Дональд Трамп да жаңы стратегиясын жарыялап жатып, Исламабадды экстремисттик топторго баш калка берип жатат деп айыптаган. Пакистан мындай айыптарды четке кагып келет.
