Өзүн "Ислам мамлекети" деп атаган террордук топ Египеттеги христиан-зыяратчыларга кол салуу үчүн жоопкерчилик алды. Экстремисттер 32 адам өлтүрүлгөнүн билдирип жатышат.
Египет бийлигинин маалыматында окуядан 29 адам каза таап, 13ү жаракат алганы жана алар ооруканада экени айтылат.
25-майда куралчан топ өлкөнүн түштүгүндөгү Минья провинциясындагы монастырга бараткан зыяратчылар түшкөн автобуска кол салган.
Окуядан кийин Египет президенти Абдел Фаттах ас-Сиси "Ислам мамлекети" террордук тобунун Ливиядагы машыгуучу базасына абадан сокку урулганын жарыялады.
Ишембиде аскерлер зыяратчыларга кол салууга катышкан согушкерлер даярдалган бир нече база жок кылынганын билдирген.
