Президент Алмазбек Атамбаев Ош облусунун Чоң-Алай жана Өзгөн райондорундагы табигый кырсыкта жабыркагандарга материалдык жардам берүү боюнча жарлыкка кол койду.
Ага ылайык, президенттик фонддон Өзгөндүн жер көчкү жүргөн Жалпак-Таш айыл аймагындагы Курбу-Таш жана Маркс айылына 1 млн сом, Зергер айыл аймагындагы Аюу айылына 1 млн сом бөлүндү. Мындан сырткары Чоң-Алай районундагы жер титирөө болгон аймактын жабыркаган тургундарына 3 млн сом жардам иретинде берилет.
Бул тууралуу президенттик аппараттын маалыматтык саясат бөлүмү бүгүн кабарлады.
29-апрелде таңга маал жүргөн жер көчкү Өзгөн районунун Зергер айыл аймагындагы Аюу-Сай айылында жети үйдү басып, 24 адам анын алдында калган. Беш күн бою жүргүзүлгөн издөө, казуу иштеринен кийин сегиз адамдын сөөгү табылган. Кооптуу жайдан ондогон тургундар көчүрүлүп, чатырларда жашап жатат.
3-5-майда болгон жер титирөөдө Чоң-Алай районунда, Баткен облусунун Кадамжай районунда ондогон турак жайларга жарака кетип, бир катар үйлөр авариялык абалга келген. 700дөн ашуун адам чатырларга көчүрүлдү. (КЕ)
