Президент Алмазбек Атамбаев Андрей Бельяниновдун кызматтан кеткенине өкүнөрүн билдирди. Бул тууралуу ал бүгүн Ысык-Көлдөгү “Рух-Ордо” комплексинде уюштурулган маалымат жыйынында айтты.
Орусиянын Федералдык бажы кызматынын мурдагы жетекчиси Андрей Бельянинов чын жүрөгү менен Кыргызстанды колдоп келгенин белгилеген мамлекет башчы маанилүү маселелерди чечүүдө анын ролу чоң болгонун кошумчалады.
- Ал Кыргызстан үчүн жакшы жумуштарды жасоого аракет кылды. Мен анын кызматтан алынганына өкүнөм, - деди Атамбаев.
Орус президенти Владимир Путин Андрей Бельяниновду иштен алган. Ага чейин алкоголдук продукциянын аткезчилигине байланыштуу кылмыш иш боюнча анын үйүндө тинтүү жүргөндө 66 миллион рубль табылган.
Бельянинов кыргыз-орус өкмөт аралык комиссиясынын теңтөрагасы болчу. (SE\AKu)
