Саясий серепчи Бакыт Бакетаев туш болгон окуяны териштирүү ички иштер министри Мелис Турганбаевдин жеке көзөмөлүнө алынды. Бул тууралуу бүгүн аталган министрликтен кабарлашты.
Бакетаевдин айтымында, ал 24-июнда Бишкекте унаасын койгону барып, терезелери бүт караңгыланган "Лексустун" айдоочусунун орой мамилесине кабылган. Окуя видеого тартылып, маалымат агенттиктердин бирине жарыяланган.
- Жөн бараткан жеримен ошондой коркутуу болду. Аны камерага тартып алдым, - деди "Азаттыкка" серепчи.
Бакетаев бул окуя өзүнүн ишмердүүлүгүнө байланыштуубу, жокпу, так айта албасын билдирди.
2010-жылдагы бийлик алмашуудан кийин түзүлгөн "Люстрация" элдик кыймылынын мүчөсү Бакыт Бакетаев мамлекеттик структуралардагы коррупция тууралуу оюн ачык айтып келет.
ИИМден кабарлашкандай, "Лексустун" айдоочусу 1987-жылы туулган, эч жерде иштебеген Бишкектин тургуну Нурлан Сүйөркулов экени аныкталды. (RK)
