Анын коомдук жактоочусу Азимбек Бекназаров 19-майдагы процессте мурунку башкы прокурор Аида Салянованы сотко чакыруу тууралуу өтүнүч келтирди. Күбөлөрдүн дээрлик баары Келдибековду жактап, айрымдары баштапкы көрсөтмөсүн анын пайдасын өзгөртүп жаткандыктан экс-спикер акталышы ыктымал деген сөздөр айтыла баштады.
Акматбек Келдибековдун коомдук жактоочусу Азимбек Бекназаров сотко мурунку башкы прокурор Аида Саляновадан сырткары өкмөттүн жана президенттин Жогорку Кеңештеги өкүлдөрүн да чакыруу тууралуу өтүнүч келтирди. Бекназаровдун айтымында, Жогорку Кеңештин Москвадагы өкүлчүлүгүн ачуу тууралуу парламенттин токтому боюнча алар да көрсөтмө бериши керек:
- Эгер ошол өкүлчүлүк мыйзамсыз ачылса, аны каржылоо үчүн өкмөт акча таап жатканда силер эмнеге каршы болгон жоксуңар, ал эми президенттин өкүлү эгер ошол токтом элге каршы болсо, анда эмнеге тыйган жоксуңар деп сурайбыз.
Азимбек Бекназаровдун ырасташынча, Келдибековдун спикерликке байланышкан кылмыш иши боюнча Жогорку Кеңештин ондой депутаты сотто көрсөтмө берди жана дээрлик баары парламенттин мурунку төрагасын жактап сүйлөдү:
- Келдибековду күнөөлүү деген бир да адам, бир да далил болбой жатат. Баары эле келип "иштин саясий өңүтү болгон, кылмыш иш козгоого негиз жок болчу" деп айтып кетип жатышат. Жогорку Кеңештин токтому үчүн парламенттин спикери жооп бербейт да. Эгер ал кыянатчыл токтом болсо, анда ага макул болгон депутаттардын баары жооп берет.
Башкы прокуратура Келдибеков спикер кезинде кызматынан кыянаттык менен пайдаланган, өкүлчүлүк мыйзамсыз ачылган жана ага он миллион сом акча бөлүнүп, өлкө казынасына зыян келген деген айып таккан.
Келдибековго мындан сырткары дагы эки кылмыш иш козголгон. Биринчиси Социалдык фонддун төрагасы, ал эми экинчиси Салык кызматын жетектеп турган маалга туура келет. Мамлекеттик айыптоочулар Келдибеков Салык кызматынын башында турганда бир миллион сомдон ашык салык өлкө казынасына түшпөй калган деген доо койгон.
Миллиондор кымырылганбы?
Башкы прокуратура Акматбек Келдибековго эң оор - коррупция боюнча айыпты Социалдык фонддогу ишине байланыштуу койгон эле. Ошол кездеги башкы прокурор Аида Салянова Келдибеков “Ротак-Бишкек” деген ишкана түзүп алып, ошол аркылуу коррупциялык айла-амал менен милллиондогон сом акчаны кымырып алган деп айтып чыккан:
- Келдибеков боюнча прокуратура кызматкерлери өз милдетин так аткарды. Кандай гана тоскоолдуктарга, кыйынчылыктарга карабай, кылмыш ишин тергеп бүтүп сотко жеткирди.
Буга чейин Келдибековдун жактоочулары Социалдык фондго байланыштуу кылмыш иштин мөөнөтү өткөнүнө байланыштуу кыскартуу тууралуу сотко өтүнүч келтиришкен эле. Азыр бул өтүнүч боюнча чечим кабыл алына элек.
Сотто күбөлөрдүн дээрлик баары Келдибековду жактап, айрымдары баштапкы көрсөтмөсүн анын пайдасын өзгөртүп жаткандыктан экс-спикер акталышы ыктымал деген сөздөр айтыла баштады.
Жогорку Кеңештин мурунку төрагасы, юрист Мукар Чолпонбаев кылмыш иштердин козголушунун саясий өңүтү бар деген пикирде:
- Келдибековго коюлган кызматынан кыянаттык менен пайдаланды деген айыпты далилдеш кыйын. Бул иштин саясий өңүтү болгондуктан башында эле токтотушса болмок. Аягы ушинтип бүтөрү башында эле белгилүү болгон да. Саясий өңүтү болгонун эми жашыруун деле эмес. Бизде эми бирөө бийликке карата туура эмес сүйлөп койсо баса калмай көрүнүшү бар. Мына, Карганбек Самаковду төрт жылдан бери камабай, бир жолу оппозицияга тамак берип койсо эле камап коюшпадыбы. Эмнеге бир күн мурда, же эмнеге ошондон эки күндөн кийин камабайт?
Келдибековдун кийинки сот процесси 26-майда болот. Ал 2013-жылы күзүндө камакка алынган болчу. Былтыр август айында ден соолугуна байланыштуу сот үй камагына чыгарган жана чет өлкөдө дарыланууга уруксат берген. Кыргызстанга Аида Салянова баш прокурорлук кызматтан кеткенден кийин кайтып келген жана сот аны үй камагына калтыруу тууралуу чечимин күчүндө калтырган.
Бул жагдай Келдибеков бийлик менен тымызын саясий соодалашууга барды, мындан улам аны актоо аракети башталды деген сөздөргө жем таштаган.
