Дүйшөмбүдө “Замандаш” партиясынын катарынан чыгарын анын беш мүчөсү: Любовь Ардамина, Станислав Епифанцев, Григорий Зозуля, Александр Степанюк жана Галина Кетова билдирди. Алар өз чечимин “партия Мухтар Өмүракунов көздөгөн баалуулуктардан тайып, макулдашылган шарттар аткарылбай жатканы” менен түшүндүрүштү. Аталган партияны маркум Мухтарбек Өмүракунов негиздеген.
Саясий бирикмеден чыгууга арыз жазгандардын бири, Кыргызстандагы орустардын “Гармония” маданий борборунун жетекчиси Александр Степанюктун “Азаттыкка” билдиришинче, партиянын учурдагы лидерлери интернационалдык идеологияны жокко чыгарып жатат:
- Мен партияга Мухтар Өмүракуновдун көзү тирүү кезде киргем. Аны жеке да таанып, ал көтөргөн идеяларды колдоп келгем. Бирок акыркы учурда Өмүракунов колдоп сүрөп келген баалуулуктар өзгөрүп, баркталбай калды. Бул радикалдуу түрдө болбосо да сезилип жатат. Маселен, партияда мурдагыдай интернационалдык дух сезилбей, анын ордун башка идеялар ээлеп алды.
Степанюк мындай өзгөрүүлөр партиянын былтыр декабрдагы курултайынан соң ачык сезилип калганын кошумчалады.
Чындыгында эле былтыр жыл аягында “Замандаш-Современник” деп аталып келген партия өзүнүн аталышын “Замандаш” улуттук кайра жаралуу партиясы деп өзгөрткөн эле. Бул улуттук баалуулуктарды колдоорун билдирип келген “Улут жүзү” фондунун негиздөөчүсү, ишкер Рустам Маманов партияга теңтөрага болуп шайланган жана жаңы мүчөлөр кабыл алынган учурга туш келген.
Ошондуктан жогорудагы беш адамдын партиядан чыгып кетүүсү дал ушул идеологиядагы өзгөрүүлөр себеп экендиги айтылып жаткан эле. Бирок бүгүн "Замандаштын" былтыртан берки теңтөрагасы Рустам Маманов да партия катарынын чыкканын жар салды. Ал “Азаттыкка” сүйлөп жатып, мындай чечимге партиялаштардын ортосундагы пикир келишпөөчүлүктөр себеп болгонун билдирди:
- Саясий көз караштын ар түрдүүлүгү, бир максатка болгон кайчы пикирлер жолубузду эки бөлбөй койгон жок. Кайсы бир бийик максатты ишке ашыруу үчүн бириккен, бир багытка бет алган тилек керек. Андай болбосо жолуңдан калбоо үчүн жалгыз сапарга чыгууга туура келет. Пикир келишпестиктер болгон үчүн партиядан чыктым.
Анткен менен “Замандаштын” учурдагы жетекчилиги түзүлгөн кырдаал партиянын ишмердигине таасир этпей турганын билдирүүдө. Анын теңтөрагасы Сапарбек Асанов жогорудагы адамдардын партиядан чыгуу боюнча расмий кайрылуусу келбегенин кабарлады:
- Азырынча бул сөздөр ушак-айыңдын деңгээлинде болуп жатат. Бизге эч кандай расмий түрдө кайрылуу келип түшө элек. Эгер түшсө чечим кабыл алып, билдиребиз. Ошондо кеңири түшүндүрмө болот. Ал эми партия өз ишмердигин уланта берет.
Ал эми партиянын дагы бир мүчөсү, анын негиздөөчүсү Мухтар Өмүракуновдун жубайы Чынара Шейшекеева “Замандаш” өз багытынан тайган жок деп ишенимде:
- “Замандаш” мурун кандай идеологияны көздөсө, азыр деле ошондой баалуулуктарды колдойт. Эч кандай деле кескин өзгөрүүгө барган жок. Ал эми учурдагы кырдаалды утурумдук маселе катары карасак болот. Анткени, бардык партияларда эле ушундай өйдө-ылдай маселелер болуп жатпайбы.
Саясий партиялар боюнча изилдөө жүргүзүп келген социолог Самар Сыргабаевдин айтымында, “Замандаштагы” түзүлгөн кырдаал өлкөдөгү башка партияларга мүнөздүү көрүнүш:
- Кыргызстанда “Замандаш” эле эмес, башка партиялар деле классикалык маанидеги көздөгөн, ишке ашырып жаткан идеологиясы жок. Алар саясий максат-мүдөөсүн утурумдук кызыкчылыкка опоңой алмаштырып, позициясын күн сайын өзгөртүшү мүмкүн. Ошондуктан, адистер бул партиялардын идеологиялык чектерин аныктоо кыйын экенин айтып келишет. Алар аталышында идеологиялык багытын көрсөткөн менен жасаган иштеринде ал билинбейт. “Замандашта” деле учурда ошондой кырдаал түзүлдү. Алар тигил же бул идеологияны так сактабайт. Бирок мигранттардын маселесине басым жасап, саясий упай алып келген болчу. Балким партия ичиндеги пикир келишпестиктер ушул багыттын өзгөрүшүнөн болушу мүмкүн.
“Замандаш” партиясы маркум Мухтарбек Өмүракунов тарабынан Орусияда жана Казакстанда иштеп жүргөн кыргызстандык мигранттардын укугун коргоо максатында алгач ассоциация катары түзүлүп, кийин партияга айланган. 2010-жылдагы парламенттик шайлоодо жаңы түзүлгөн партия болгону карабастан, жакшы жыйынтык көрсөтүп, 29 партиянын ичинен сегизинчи орунду ээлеген. Бирок 2011-жылы Өмүракунов күтүүсүз кырсыктан каза болгон соң “Замандаштын” активдүүлүгү солгундап кеткенинин саясий серепчилер айтып жүрүшөт.
“Замандаш” партиясынын негиздөөчүсү Мухтарбек Өмүракунов 2011-жылы 1-майда алыскы Куба өлкөсүндө деңиз жээгинде эс алып жүргөн учурунда күтүлбөгөн кырсыктын айынан мезгилсиз дүйнөдөн кайткан.
