Талас районунун Козучак айылынан бир туугандар - Жакыпбек менен Калыбек Асранкулов Экинчи Дүйнөлүк согушка аттанып, бирок кайтышкан эмес. Алар каерде, кандай шартта өлгөнү да бүгүнкү күнгө чейин так белгисиз. Жети бир туугандын кичүүсү, учурда 75 жашка чыккан Сейдимкан Асранкулова майдандан кайтпай калган бир тууган эки агасы тууралуу маалыматтарды, алардын өлгөн жерин издеп жүрөт. Ал «Азаттыкка» маек куруп, согуш жылдарындагы элдин башына түшкөн апаат, оорчулуктарды эскерип, жаштарга насаатын айтты.
