“Ислам мамлекети” экстремисттик тобунун согушкерлери барымтадагы япон жана иордан жарандарын 24 сааттын ичинде жок кыларын билдирди.
Шейшембиде интернеттеги жихадчыл сайттардын биринде япон журналисти Кэндзи Гото жана иорданиялык учкуч Мааза аль-Кассасбеханын сүрөттөрүн чагылдырган видео тасма чыкты. Кадр сыртындагы Готонуку деп болжолдонгон үн “эгер Иордан бийлиги камактагы ирак жараны Сажида ар-Ришавини бошотушпаса, алар жок болоорун” айтууда.
Сажида ар-Ришави теракт уюштурууга аракет кылган деген айып менен кармалган, “Аль-Каида” уюмунун мүчөсү деп шектелген ирактык аял.
Кэндзи Гото 20-январда Сирияда япон ишкери Харуна Юкава менен биргеликте барымтага түшкөн. Юкаванын башы согушкерлер тарабынан 24-январда алынган.
Мааз аль-Кассасбех “Ислам мамлекети” уюмуна каршы жүргүзүлүп жаткан АКШ баштаган коалициялык күчтөрдүн барымтага түшкөн биринчи өкүлү.
“Ислам мамлекети” радикалдык уюму 2014-жылдын жай айларынан бери Сирия жана Ирактын басымдуу бөлүгүн өз карамагына алды.
