Орусиянын кабар агенттиктери өлкөнүн тышкы иштер министринин орун басары Григорий Карасинге шилтеме берип, Москва 5-январда украин, немис, француз өкүлдөрү менен сүйлөшүүгө катышаарын маалымдашты.
Аталган өлкөлөрдүн жетекчилери Казакстанда 15-январда жолугушаары пландалган.
Былтыр 5-сентябрда жетишилген элдешүүгө карабастан, Украинада согуш аракеттери токтобой келатат. Өткөн жылдын апрелинде башталган калабада 4700дөн ашык кишинин каны төгүлдү.
4-январда Украинанын чыгышында орусиячыл жикчилдер көзөмөлдөгөн Донецк шаарында жаңы жыл тосуу маалында убактылуу алынып салынган коменданттык саат кайра күчүнө кирди. Коменданттык саат 31-декабрдан 3-январга чейин майрамга байланыштуу убактылуу алынган.
