Муфтият өлкөдөгү диний кызматкерлерди билим деңгээли боюнча электен өткөрүүдө. Бул тууралуу "Азаттыкка" муфтийдин орун басары Равшан ажы Эратов билдирди. Анын айтымында, Мусулмандар дин башкармалыгынын кызматкерлери аттестациядан өтүп бүттү.
- Аттестация баскычтарга бөлүнөт. Эми кезек райондук, шаардык жана облустук имам, казыларга келди. Январь, февраль айларында айылдык молдолор электен өтөт, - деди Эратов.
Өлкөдөгү диний кызматкерлерди аттестациядан өткөрүү 11-ноябрда башталган. Аттестация билим деңгээли жана жүрум-туруму талапка жооп бербеген дин кызматкерлерден арылууну көздөйт. (UEz)
